Portugalia, Spanja dhe Franca ende në flakë, përmirësohet Rumania

Zjarrfikësit në Portugali vijojnë luftën me flakët shkatërruese, në një kohë kur i gjithë shteti mbetet në alarm. Një avion që po përpiqej të shuante zjarrin nga ajri u rrëzua në veri të vendit, duke bërë që piloti i tij të gjente vdekjen.

 “Qeveria nuk bën gjithçka. Vetë qytetarët bëjnë më shumë se qeveria. Ne ecim rrugëve dhe kushdo mund të shohë se pemët formojnë tunele njëri sipër tjetrit. Në këto kushte, si mund të mos kalojë zjarri nga njëra rrugë në tjetrën,” – u shpreh një qytetar.

Përvëlimi që ka përfshirë Evropën jug-perëndimore është i dyti brenda pak javëve. Shkencëtarët fajësojnë ndryshimet e klimës dhe parashikojnë episode të mëtejshme të motit ekstrem. Në Francë situata vijon të jetë e tensionuar.

 “Aktualisht kemi 3.150 hektarë tokë të djegur dhe më duhet të theksoj se zjarri nuk është ende nën kontroll. Nuk po e frenojmë dot. Situata është kritike,” – tha Ronan Leaustic, nënprefekt i Arkashon.

Në Spanjë, pas 3 ditë përpjekjesh të dështuara, zyrtarët që po koordinojnë operacionet thanë se situata është përmirësuar pakëz në një nga frontet e zjarrit.

Ndërsa në Evropën lindore, në Rumani, zjarrfikësit arritën të shuanin mbi 20 zjarre në tre ditët e fundit, që kishin prekur thuajse 100 hektarë tokë të mbjellë në kontenë Mehedinti. Banorët u angazhuan gjithashtu në operacione, nga frika se mos zjarret arrinin banesat e tyre.

LEXONI GJITHASHTU:

• Situatë kritike nga zjarret, digjen mijëra hektarë në Portugali e Spanjë