Praga dëbon dy diplomatë rusë pas pretendimit të rremë mbi komplotin për vrasjen e kryebashkiakut

Kryeministri i Çekisë ka deklaruar se komploti për të vrarë kryebashkiakun e Pragës ishte i rremë.  

Në prill, mediat vendase raportuan se shërbimet e inteligjencës dyshonin se një person nga Rusia, i cili kishte shkuar në Çeki me pasaportë diplomatike, kishte për qëllim të helmonte kryetarin e bashkisë së Pragës Zdenek Hrib.

Por kryeministri Andrej Babis tha të premten “se e gjithë çështja ishte rezultat i një lufte të brendshme midis stafit të Federatës ruse në Pragë”.

“Një prej tyre i ka dërguar shërbimeve të inteligjencës informacione të rreme për një komplot të planifikuar kundër politikanëve çek”, tha ai.

Babis u shpreh se si rrjedhojë e këtij hetimi nga inteligjenca çeke, dy diplomatët rusë janë dëbuar nga vendi.

Pas pretendimeve për komplot, Hrib u vendos në mbrojtje nga policia.

Lexoni gjithashtu: 

Rusia mohon përfshirjen në komplotin e atentatit kundër kryetarit të bashkisë së Pragës