Presidenti Begaj: E nevojshme mbrojtja e shqipes nga padija gjuhësore

Presidenti Bajram Begaj foli sot nga konferenca e 50-vjetorit të Kongresit të Drejtshkrimit.

Në fjalën e tij ai tha se është e rëndësishme që lëndës së gjuhës dhe letërsisë shqipe duhet t’i jepet përparësi në shkolla.

Ndër të tjera ai theksoi se puna për pasurimin e fjalorit të shqipes dhe përpilimin e fjalorëve, që pasqyrojnë ndërveprimin e saj me gjuhë të tjera, duhet të jetë parësore për akademikët dhe gjuhëtarët.

Presidenti nënvizoi se rëndësishme është nevoja për mbrojtjen e shqipes nga padija gjuhësore dhe mosrespektimi i rregullave të saj.

“Në një botë, ku kulturat e mëdha po ngushtojnë gjithnjë e më shumë hapësirat për kombe e kultura të vogla, nevoja për pasurimin e gjuhës dhe mbrojtjen e saj nga huazimet e panevojshme është e madhe. Veçanërisht diaspora duhet mbështetur me politika e programe të posaçme. Edhe pse larg atdheut të të parëve, brezat e rinj duhet të rriten me vetëdijen se i përkasin të njëjtës botë shqiptare.

Ngjyrimet dialektore janë pasuri dhe pjesë e trungut origjinal të shqipes, të cilat i bëjnë nder gjuhës dhe e mbrojnë nga huazimet e panevojshme. Sa më të gjerë kufijtë e gjuhës, aq më të gjerë dimensionet e mendimit dhe shprehjes së një njeriu dhe të kombit. Shqipja është bota jonë – një botë që pret ta eksplorojmë dhe pasurojmë bashkërisht, deri në kufijtë e skajshëm të saj. “Një komb një gjuhë”- tha Presidenti Begaj.

LEXONI GJITHASHTU: 

• Fyerjet e Ramës ndaj opozitës, Tabaku: Sjellje e tij sa herë ka një aferë korruptive
• Tabaku për Portin e Durrësit: Rama i jep 812 mijë m2 tokë shtetërore investitorit