Presidenti brazilian Luiz Inacio Lula da Silva tha të shtunën se embargoja amerikane ndaj Kubës është “ilegale” dhe dënoi përfshirjen e vendit ishull në listën e vendeve që sponsorizojnë terrorizmin, gjatë vizitës së tij të parë në Kubë në mandatin e tij të tretë presidencial.
“Kuba ishte një avokate e qeverisjes më të drejtë globale. Deri më sot, ajo është viktimë e një embargoje të paligjshme ekonomike. Brazili është kundër çdo mase shtrënguese të njëanshme. Ne refuzojmë përfshirjen e Kubës në listën e shteteve që sponsorizojnë terrorizmin”, tha Lula gjatë fjalimit të tij në hapjen e Samitit të G77 të vendeve në zhvillim në Havana, raporton Reuters.
Ish-presidenti i SHBA-së, Donald Trump e përfshiu Kubën në listën e shteteve sponsorizuese të terrorizmit dhe pavarësisht se administrata e pasardhësit të tij, Joe Biden, ka anuluar shumë nga masat e Trump, ajo ende nuk e ka hequr Kubën nga lista.
Këtë Lula e tha vetëm pak orë para se të nisej për në Nju Jork, ku do të marrë pjesë në Asamblenë e Përgjithshme të OKB-së dhe do të ketë bisedime dypalëshe me Biden.
Më herët, Kuba shprehu shqetësimin për përfshirjen në listën e sponsorëve të terrorizmit dhe embargos ekonomike prej dekadash të Uashingtonit, e cila daton që nga periudha e Luftës së Ftohtë.
Kuba dhe kritikët e sanksioneve ekonomike thonë se embargo parandalon dhe pengon aksesin në ushqim, ilaçe dhe furnizime të tjera kritike të nevojshme për zhvillim.
