Presidenti Hashim Thaçi shtyn për nesër komunikimin publik mbi akuzat e Speciales

Presidenti i Kosovës, Hashim Thaçi kishte paralajmëruar se do të fliste sot nga zyra e tij pas akuzave që ngriti Zyra e Prokurorisë Speciale në Hagë, por ky komunikim është shtyrë për ditën e nesërme.

Lajmi është konfirmuar nga zyra e presidentit Thaçi, e cila thekson se kreu i shtetit do t’u drejtohet nesër qytetarëve në orën 20:00, raporton Kosova Press. Në aktakuzë pretendohet se, Thaçi, Veseli dhe të dyshuar të tjerë janë penalisht përgjegjës për afërsisht 100 vrasje të paligjshme.

Krimet e paraqitura në aktakuzë e Speciales përshijnë qindra viktima të identifikuara shqiptarë, serbë dhe romë të Kosovës dhe kundërshtarë politikë. Kjo aktakuzë është vetëm një padi penale e cila është rezultat i një hetimi të gjatë nga Zyra e Prokurorit të Specializuar.

Pas akuzave në adresë të Thaçit, analistët dhe njohësit e zhvillimeve politike janë të ndarë në qëndrimet e tyre. Një pjesë janë shprehur se pas kësaj z. Thaçi duhet të japë menjëherë dorëheqjen, ndërsa të tjerë janë të mendimit se presidenti i Kosovës nuk ka arsye të ndërmarrë një akt të tillë. Gjithsesi, kjo dilemë e krijuar në opinionin publik pritet të sqarohet nga vetë Thaçi, gjatë komunikimit që pritet të mbajë nesër në mbrëmje.

Lexoni gjithashtu: 

Prokuroria Speciale e Kosovës akuzon Thaçin dhe Veselin si përgjegjës për 100 vrasje

Akuzat ndaj Thaçit për krime lufte, Meta: Besojmë në pafajësinë e luftëtarëve të UÇK-së

Hashim Thaçi anulon pjesëmarrjen në takimin për dialogun në Shtëpinë e Bardhë