Presidenti i Afrikës së Jugut: Bojkoti i samitit G20 nga Trump është humbja e tyre

Presidenti i Afrikës së Jugut, Cyril Ramaphosa, tha se vendimi i Presidentit të Shteteve të Bashkuara, Donald Trump, për të bojkotuar samitin e Grupit të 20 vendeve, G20, fundjavën e ardhshme në Johannesburg është “humbja e tyre”.

SHBA-të kanë rritur tensionet me Afrikën e Jugut për shkak të pretendimeve të refuzuara gjerësisht për persekutimin e pakicës së bardhë afrikane, të cilat SHBA-të i mohojnë me forcë, si dhe për shkak të presionit të tyre për përgjegjësi nga Izraeli për gjenocidin në Gaza në Gjykatën Ndërkombëtare të Drejtësisë (GJND).

Duke folur të mërkurën, Ramaphosa shtoi: “Shtetet e Bashkuara duhet të mendojnë përsëri nëse politika e bojkotit funksionon vërtet, sepse nga përvoja ime nuk funksionon.”

Sakaq, Trump tha të premten se asnjë zyrtar amerikan nuk do të marrë pjesë në samitin e G20 të këtij viti më 22-23 nëntor, ku marrin pjesë udhëheqës nga 19 prej ekonomive më të pasura dhe kryesore në zhvillim në botë, Bashkimi Evropian dhe Bashkimi Afrikan.

Trump përmendi trajtimin e fermerëve të bardhë nga Afrika e Jugut, të cilin ai e ka etiketuar si “gjenocid”, duke shkruar në platformën e tij Truth Social se ishte një “turp i plotë që G20 do të mbahet në Afrikën e Jugut”.

Që kur u kthye në Shtëpinë e Bardhë në janar, Trump ka pohuar vazhdimisht se afrikanojugorët e bardhë po persekutohen dhunshëm dhe po u merret toka për shkak të racës së tyre në vendin me shumicë të zezë, një pretendim i hedhur poshtë nga qeveria e Afrikës së Jugut dhe zyrtarët e lartë afrikanë.

Për muaj të tërë, Trump e ka kritikuar qeverinë e vendit të udhëhequr nga të zinjtë për këtë dhe një sërë çështjesh të tjera, përfshirë vendimin e saj për të akuzuar aleatin e fortë të SHBA-së, Izraelin, për gjenocid kundër palestinezëve në Gaza në një çështje që është në vazhdim në GJND në Hagë.

Ndërkohë, muajin e kaluar, Ramaphosa tha se armëpushimi aktual në Gaza, të cilin Izraeli po e shkel çdo ditë, nuk do të ndikojë në padinë e vendit të tij për gjenocid kundër Izraelit, duke theksuar se Afrika e Jugut është e vendosur të ndjekë padinë e saj, të ngritur në vitin 2023, pavarësisht armëpushimit, i cili është pjesë e një plani të mbështetur nga SHBA-të që synon t’i japë fund luftës së Izraelit në territorin e rrethuar dhe të bombarduar.

LEXONI GJITHASHTU:

• Trump: SHBA do të bojkotojë samitin e G20 në Afrikën e Jugut
• Trump: Asnjë zyrtar amerikan nuk do marrë pjesë në samitin e G20 në Afrikën e Jugut