‘Presidenti i ri’, Mediu: Duhet proces gjithëpërfshirës, LSI-ja u la jashtë

Deputeti Fatmir Mediu thotë se opozita duhet të jetë e bashkuar në negociatat për zgjedhjen e Presidentit të ri të Republikës.

Në emisionin “Now” në “Euronews Albania”, Mediu u shpreh se nga ky proces nuk mund të përjashtohen parti që kanë peshë elektorale, si Lëvizja Socialiste për Integrim.

“Ne duhet të shkojmë duke përfaqësuar të gjithë interesin opozitar, interesin e qytetarëve që kanë votuar opozitën më 25 prill. Këtu nuk mund të përjashtohen as deputetë dhe as partitë politike. Nuk mund të përjashtohet nga ky proces një parti e cila ka një peshë elektorale më të madhe se partitë e tjera, siç është LSI-ja”, tha ai.

Sipas Mediut, duhet mirëkuptim për të zgjedhur tre përfaqësues të cilët përfaqësojnë të gjithë vullnetin e opozitës për të negociuar.

Kryetari i komanduar i PD-së, Enkelejd Alibeaj u dakordësua me Kreun e Grupit Parlamentar të PS-së, Taulant Balla këtë të mërkurë, që procesi për zgjedhjen e presidentit të nisë zyrtarisht më 10 maj.

LEXONI GJITHASHTU

• PS nis bisedimet me opozitën për Presidentin e ri, Rama: Të hapur për emra
• Alibeaj: Jam dakord, procesi për presidentin të nisë më 10 maj