Presidenti Meta mesazh qytetarëve pas votimit: Sot atdheu mbrohet me votë

Presidenti i Republikës, Ilir Meta ka votuar që në minutat e para të hapjes së qendrave të votimit. Z. Meta bëri thirrje për pjesëmarrje masive në proces ndërsa ftoi qytetarët që përveç partive të përzgjedhin dhe kandidatët për deputetë që mendojnë se do të luftojnë korrupsionin dhe nuk do t’i nënshtrohet kryetarit të partisë.

“Më në fund erdhi kjo ditë e bekuar, kjo ditë e mrekullueshme edhe Zoti na ka ndihmuar sot që sovrani t’i ketë kushtet sa më të mira për ta shprehur vullnetin e tij dhe që republika jonë të ripërtërirë themelet e saj përmes votës së  lirë të çdo qytetari. Barazinë para ligjit na e garanton vetëm barazia e votës. Çdo qytetar të votoi i lirë dhe me dinjitet dhe këtë herë kanë mundësi të votojnë për kandidatin që besojnë. Të zgjedhin kandidatët më të ndershëm dhe më me integritet”, deklaroi kreu i shtetit.

Presidenti tha se pjesëmarrja në votim është “një detyrim qytetar dhe një e drejtë demokratike, sot është një akt patriotik” dhe shtoi se “sot atdheu mbrohet me votë dhe me sjellje të qytetëruar evropiane”.

“Një mbarëvajtje e këtij procesi do ta bindë Evropën për inicimin në BE. Votoni për atë që keni në mendjen dhe zemër, për kandidatët që do të luftojnë korrupsionin dhe nuk do t’i binden si kukulla kryetrarëve të tyre”, përfundoi z. Meta.