Presidentja Osmani e quan të rrezikshme iniciativën e ‘Open Balkan’

Presidentja e Kosovës, Vjosa Osmani e ka quajtur të rrezikshme iniciativën e “Open Balkan” në rajonin ballkanik.

Ajo theksoi se qasja e kësaj iniciative krijon vonesa në integrimin  e shteteve të Ballkanit Perëndimor në Bashkimin Evropian.

“Sa i përket iniciativës ‘Ballkani i Hapur’, besojmë se ajo, jo vetëm që është një iniciativë e rrezikshme, por njëkohësisht synon vonimin e procesit të integrimit evropian të shteteve të regjionit”, tha Osmani.

Kryetarja e shtetit tha se Kosova është konstruktive në dialogun me Serbinë, por nuk pranojnë të diskutojnë për integritetin territorial, statusin e vendit dhe nivelin e tretë qeverisës, siç është asociacioni i komunave serbe në Kosovë.

“Ne nuk do të pranojmë të negociojmë për integritetin territorial të Kosovës, ne nuk do të ndryshojmë kushtetutën për të krijuar nivele të treta të qeverisë, për ta bërë një tjetër Republika Serbska për ta destabilizuar rajonin”, shtoi presidentja.

Gjatë vizitës në Gjermani, duke diskutuar për të ardhmen e Kosovës në Rrjetin për Politikë të Jashtme (DGAP) znj, Osmani tha se Kosova po bëhet gati të aplikojë në organizata ndërkombëtare.

Gjithashtu edhe kryeministri Albin Kurti pohoi dje pas takimit me kancelaren e Gjermanisë Angela Merkel se Kosova nuk do të bëhet pjesë e iniciativave të tilla.

Sipas tij, Kosova nuk merr pjesë në iniciativa rajonale nëse Bashkimi Evropian nuk është pjesë e tyre.

LEXONI GJITHASHTU: 

• Rama mesazh Kosovës: ‘Open Balkan’ nuk ka kontradiktë me Procesin e Berlinit
• Kurti konfirmon për Euronews Albania se Kosova nuk merr pjesë në ‘Open Balkan’