Procesi për zgjedhjen e presidentit nuk është transparent, sipas analistit

Analisti Erlis Çela thotë se procesi për zgjedhjen e presidentit të ri nuk është transparent dhe serioz.

Në emisionin “Now” në “Euronews Albania”, Çela u shpreh se procesi është i paqartë sepse nuk dihet se mbi ç’bazë kërkohet konsensusi për zgjedhjen e Kreut të ri të Shtetit.

“Unë mendoj që së pari palët nuk kanë qenë të qarta për çfarë po diskutohet. Asnjë, përveç atyre që janë ulur në Kryesinë e Kuvendit, se e di çfarë është baza e këtij konsensusi që kërkohet. Mbi ç’bazë kërkohet konsensusi? Këtu është e paqartë dhe procesi është jo transparent”, tha Çela.

Sipas tij, në seancën e sotme mazhoranca duhet të kishte një propozim.

“Konsumojmë raundet për të shkuar në një skenar që të gjithë e dimë. Mazhoranca do e zgjedhë vetë presidentin. Procesi më le një shije të keqe sepse nuk është serioz. Mazhoranca duhet të shkonte me një propozim sot në parlament, për t’i dhënë seriozitetin e duhur”, deklaroi Çela.

Këtë të hënë ka dështuar raundi i parë për zgjedhjen e Presidentit të Republikës. Në seancën plenare nuk u paraqit asnjë kandidaturë, ndaj dhe nuk pati votim.

LEXONI GJITHASHTU

• Haxhiu: Rama kërkon që të ketë përplasje brenda opozitës për presidentin e ri
• Dështon raundi i parë për zgjedhjen e presidentit
• Rama: Nëse nuk ka konsenus, e zgjedhim vetë presidentin në raundin e katërt