Prokuroria e Posaçme publikon bilancin e masave të sigurimit për vitin 2024

Prokuroria e Posaçme ka publikuar një bilanc të masave të sigurimit që janë vendosur gjatë vitit 2024. Sipas të dhënave të shpërndara për publikun, në total janë dhënë masa sigurimi për 629 persona, prej të cilëve 236 janë vendosur në masën e “arrestit me burg”.

Nga këto masa sigurimi, ndahen edhe specifikat për kategoritë e veprave penale:

• Për korrupsionin, masa “arrest me burg” përbën 5.1% të totalit të masave të caktuara.
• Për krimin e organizuar, masa “arrest me burg” përbën 30.84% të totalit të masave të sigurimit të regjistruara.

Publikimi i këtyre të dhënave vjen pas akuzave të bëra nga politika, e cila ka kritikur SPAK për përdorim të tepruar të masës së sigurisë “arrest me burg”. Prokuroria e Posaçme ka theksuar se veprimet e saj janë në përputhje me ligjin dhe standardet e drejtësisë penale, duke u mbështetur në praktikën ligjore dhe provat e mbledhura gjatë hetimeve.