Protesta kundër Dodik në Bosnje, opozita e akuzon për manipulim të zgjedhjeve

Disa mijëra persona në Bosnje mbushën sërish rrugët për të protestuar nën dyshimin se lideri pro-rus ka manipuluar votat në zgjedhjet e përgjithshme të mbajtura më herët gjatë muajit.

Partitë e opozitës në Republikën Serbe, një nga dy entitetet e Bosnje Hercegovinës, deklarojnë se kandidatja e tyre Jelena Triviç mposhti liderin e hershëm nacionalist Milorad Dodik, në zgjedhjet e 2 tetorit.

Ata kërkojnë një rinumërim të votave për presidentin, pas raportimeve të shumta për parregullsi.

“Ne u kërkojmë institucioneve gjyqësore të kryejnë hetime dhe të mbajnë përgjegjës të gjithë individët që morën pjesë në vjedhjen e organizuar të zgjedhjeve, të cilën e kemi provuar para publikut. Hajdutët kanë ndryshuar vullnetin e popullit”, tha Jelena Triviç, kandidate e opozitës në Bosnje.

Ndërkohë, Dodik, i konsideruar politikani më i fuqishëm i rajonit gjysmë-autonom serb, ka mohuar akuzat për mashtrime elektorale.

Dodik ka sunduar praktikisht i pasfiduar për vite më radhë, pavarësisht se është sanksionuar nga Perëndimi për mbështetjen e shkëputjes së Republikës Serbe nga pjesa tjetër e Bosnje e Hercegovinës.

LEXONI GJITHASHTU:

• KQZ vendos rinumërim të votave për presidentin e ri të Bosnje-Hercegovinës
• Zgjedhjet në Bosnjë, Dodik: Nëse fitoj, Republika Serbe do ketë pavarësi të plotë