Protesta në Ekuador, vrasja e kandidatit për president, qytetarët kërkojnë drejtësi

Vrasja e kandidatit për president Fernando Villavicencio ka shkaktuar dhimbje në Ekuador. Mbështetës të liderit anti-korrupsion të qendrës së djathtë u mblodhën në qytetin Kuito për të kërkuar një hetim të ngjarjes.

Pas shpalljes së disa ditëve zi kombëtare, autoritetet ekuadoriane kanë sinjalizuar një grup shtetasish kolumbianë të dyshuar si autorë materialë të vrasjes.

Presidenti Guillermo Lasso ka kërkuar asistencë për të hetuar atentatin nga Shtetet e Bashkuara, që kanë dërguar një ekip të FBI-së në Ekuador.

“Po protestojmë për të kërkuar drejtësi për vrasjen e Fernando Villavicencio. Duam drejtësi. Vetëm kështu mund të ndëshkohet mendja kriminale që çoi në vrasjen e kryetarit tonë”, tha Natalia Carrión, politikane.

Në Ekuador vazhdon gjendja e emergjencës e shpallur pas vrasjes, që vjen dy javë pas ekzekutimit të një kryebashkiaku.

Për profesorin e Shkencave të Komunikimit në Universitetin Simon Bolivar dhe këshilltarin politik Gustavo Isch, dhuna politike në Ekuador ka gjasa të vazhdojë gjatë.

“I gjithë vendi është i shqetësuar pasi tema e dhunës këtu në Ekuador, sidomos dhunës politike, ka ardhur duke u intensifikuar në dy dekadat e fundit. Në të kaluarën kemi pasur vrasje, por ekzekutimi i një kandidati për president përbën një diferencë të madhe. Nuk jemi mësuar të jetojmë me një situatë të tillë. Ajo që ka ndodhur në Meksikë, që ka ndodhur në Kolumbi tani po ndodh në Ekuador dhe nëse nuk zgjidhet do të ketë pasoja”, u shpreh Gustavo Isch, profesor i Shkencave të Komunikimit.

Fotoja e Villavicencio do të vazhdojë të jetë në fletët e votimit, që tashmë janë printuar për ditën e zgjedhjeve, të dielën e 20 gushtit.

LEXONI GJITHASHTU:

• Intervista para vrasjes e kandidatit në Ekuador: Vendin e kontrollon mafia shqiptare
• Vritet kandidati për president në Ekuador, disa ditë para zgjedhjeve