Protesta në Gjeorgji, qytetarët kërkojnë lirimin e ish-presidentit Saakashvili

Tubime solidariteti shoqëruar me kërkesën për transferimin jashtë shtetit për trajtim të ish-presidentit Mikheil Saakashvili u mbajtën në shumë qytete të Gjeorgjisë, si dhe në qytete të tjera të Evropës.

Protestuesit bënë thirrje për lirimin e ish-presidentit të burgosur për shkak të përkeqësimit të gjendjes shëndetësore të tij.

“Po bashkohemi me manifestimet globale që janë të lidhura me gjendjen e presidentit të tretë të Gjeorgjisë, Saakashvili. Tubimi u njoftua nga miqtë tanë ukrainas dhe tani demonstratat po zhvillohen edhe në vende të tjera. Mesazhi është të shpëtojmë një jetë, atë të Mikheil Saakashvilit”,  tha Akaki Minashvili, Lëvizja e Unitetit Kombëtar.

Menjëherë pas kthimit nga Ukraina, Saakashvili u burgos dhe po shlyen një dënim 6-vjeçar në një burg gjeorgjian për abuzim me pushtetin. Mbështetësit e tij pretendojnë se vendimi i gjykatës ka qenë i motivuar politikisht.

Pasi qëndroi në grevë urie për shumë javë, gjendja e tij shëndetësore nisi të përkeqësohet. Ekipet mjekësore të huaja dhe vendase që e vizituan deklaruan se Saakashvili po vuan nga një demencë progresive. Disa prej tyre besojnë se kjo mund të jetë e lidhur me helmimin e tij me metale të rënda.

Por pavarësisht kësaj, zyrtarët gjeorgjianë nuk ndajnë të njëjtin mendim për gjendjen kritike shëndetësore të ish-kreut të shtetit.

Ata thonë se ai po përpiqet të shmangë procesin gjyqësor dhe të mashtrojë shoqërinë dhe partnerët ndërkombëtarë. Në të njëjtën kohë, një protestë u mbajt përpara pallatit presidencial.

Tani, presioni është rritur mbi presidenten aktuale të Gjeorgjisë, Salome’ Zurabiçvili. Janë bërë gjithashtu disa javë që nga nisja e demonstratave përpara zyrave të administratës së saj, me diplomatë, politikanë dhe mjekë gjeorgjianë që janë bashkuar me qytetarët. Ata i kërkuan bashkarisht presidentes aktuale që ta falë Saakashvilin, pasi sipas tyre, gjendja shëndetësore e tij po përkeqësohet çdo ditë, gjë që mund të ketë pasoja të rënda.

LEXONI GJITHASHTU:

• Hungaria e Gjeorgjia nënshkruajnë marrëveshje për partneritet në energji
• Gjeorgjia paralajmëron ndryshim të regjimit të vizave për rusët