Protesta për drejtësi në Itali pas vrasjes brutale të emigrantit nigerian

Dy marshime u zhvilluan në Itali, përmes të cilave qytetarët kërkuan drejtësi për vrasjen brutale në mes të ditës të një emigranti nigerian nga një shtetas italian.

Një nga marshimet u organizua nga komuniteti nigerian në provincën Maçerata, e drejtuar nga bashkëshortja e viktimës dhe dy vëllezërit e tij.

Organizatorët e tubimit deklaruan se nuk donin që kërkesa për drejtësi të mbulohej nga akuzat për racizëm, për të cilat u shprehën të vetëdijshëm se nuk mund të provohen.

Marshimi i dytë u mbajt ndërkohë në të njëjtin aks rrugor një orë më vonë, nën drejtimin e shoqatës Italianët me Ngjyrë. Manifestuesit kërkuan nga autoritetet që të njohin aspektin e racizmit në vrasjen e 29 korrikut.

Një video që ka qarkulluar në internet tregon agresorin teksa shtrin në tokë emigrantin afrikan dhe nis ta mbysë atë me duar.

Zëri i një personi dëgjohet teksa i bën thirrje agresorit të ndalet, por askush nga të pranishmit nuk ndërhyri fizikisht, duke ngjallur zemërim për indiferencën.

Policia arrestoi të dyshuarin Filippo Ferlazzo, 32 vjeç, por përjashtoi që sulmi i tij të ketë pasur motive raciste.

LEXONI GJITHASHTU

• Vrasja barbare e emigrantit afrikan në mes të qytetit zemëron italianët
• Italianët i bëjnë thirrje Draghit që të mos dorëhiqet