Protestat qytetare në Tiranë, reagojnë organizatorët për incidentin me flamurin e Izraelit: Mes nesh ka të infiltruar

Një prej nismëtarëve të protestës qytetare, Arben Kola, ka bërë deklarata të forta në prag të nisjes së tubimit, duke ngritur shqetësime për praninë e grupeve të infiltruar brenda lëvizjes.

Sipas Kolës, këto grupe po përpiqen të devijojnë qëllimin e protestës dhe t’i japin asaj karakteristika me prapavijë fetare apo kombëtare, gjë që sipas tij dëmton natyrën qytetare të nismës.

Ai paralajmëroi se identiteti i këtyre personave do të bëhet publik në ditët në vijim, ndërsa i bëri thirrje organeve të rendit dhe sigurisë që të ndërhyjnë në kohë, përpara se situata të dalë jashtë kontrollit të vetë organizatorëve të protestës.

“Mes nesh ka grupe të infiltruara që heqin perden dhe bashkohen me ne. Në ditët në vazhdim do i nxjerrim me fytyra dhe emra. I dimë grupet greke që operojnë këtu kundër Shqipërisë, grupet serbe po ashtu i dimë. Dimë edhe linjat fetare nga Turqia që duan t’i japin narrativë fetare protestës. Nuk do e zhbëjnë dot. Ky është vullnet i shqiptarëve,” deklaroi Kola.