Protestë në Milano, qytetarët kundër shitjes së “San Siros” Milanit dhe Interit

Ndërsa Këshilli i Qytetit të Milanos po voton mbi shitjen e stadiumit “San Siro” për klubet AC Milan dhe Inter, jashtë ndërtesës së Palazzo Marino komitetet qytetare kanë dalë në protestë kundër vendimit të administratës komunale.

Kambanat dhe boritë e tifozëve kanë shoqëruar protestën simbolike kundër asaj që qytetarët e quajnë një shitje të papranueshme të një pjese të historisë së qytetit.

Komitetet e banorëve dhe aktivistëve kundërshtuan planin për të shembur stadiumin aktual dhe për të ndërtuar një të ri në vend të tij.

“Jemi këtu për të thënë se stadiumi San Siro nuk duhet të shitet, por të rinovohet,” deklaruan protestuesit për Milanotoday.

Sipas tyre, shembja e stadiumit aktual dhe ndërtimi i një objekti të ri do të sillte ndotje të lartë, shqetësime për banorët dhe konsum të panevojshëm të tokës urbane. Ata theksuan se stadiumi aktual është funksional dhe ka nevojë vetëm për përmirësime, jo për zëvendësim total.

“Shitja e tij për një shumë të ulët, e cila është më e vogël se vlera e një lojtari të nivelit të lartë të Serie A, është e papranueshme. Po shesim një pjesë të historisë së futbollit italian,” thanë organizatorët e protestës.

Ndërkohë, partitë e shumicës dhe opozitës në këshillin bashkiak debatonin mbi fatin e stadiumit legjendar, i njohur edhe si “Giuseppe Meazza”, që ka qenë shtëpia e dy klubeve më të mëdha të qytetit për dekada me radhë.