Protesta me tensione sot te parlamenti lëndohen 4 policë

Gjatë protestës së organizuar këtë të martë pranë ambienteve të godinës së Parlamentit, në kohën kur zhvillohej seanca plenare, janë shënuar disa incidente dhe përplasje mes protestuesve dhe forcave të policisë.

Sipas burimeve policore, gjatë përplasjeve janë lënduar 4 punonjës të Policisë së Shtetit, konkretisht të Forcës së Posaçme “Shqiponjat” dhe të Patrullës së Përgjithshme.

Protestuesit kanë zhvilluar tubimin në momentin e seancës plenare dhe në përfundim të saj janë shënuar tensione, teksa ata kanë bërë thirrje kundër deputetëve dhe kanë goditur me vezë automjetet e deputetëve dhe ministrave gjatë daljes së tyre nga ambientet e Kuvendit. Policia ka ndërhyrë dhe ka shoqëruar rreth 6 persona në komisariat, pasi ata janë përfshirë në incidente gjatë protestës.

Forcave të Policisë u janë bashkuar edhe forcat e FNSH-së për të menaxhuar situatën. Gjatë ndërhyrjes janë regjistruar sërish tensione, ku efektivët kanë shtyrë protestuesit me qëllim largimin e tyre nga hyrja e Parlamentit dhe sigurimin e kalimit të lirë të mjeteve zyrtare.

Në përfundim, protestuesit janë larguar nga hyrja e godinës së Kuvendit, ndërsa ministrat dhe deputetët janë larguar me automjetet e tyre nga ambientet e institucionit.