PS shpall fitoren në Njësinë nr. 1 dhe nr. 2 në Tiranë

Mes ovacioneve për fitore, kryebashkiaku i Tiranës dhe drejtuesi i Partisë Socialiste në këtë qark, z. Erion Veliaj paraditen e sotme ka njoftuar nëpërmjet dy daljeve të njëpasnjëshme për mediat,  fitoren e PS-së në Njësitë nr. 1 dhe nr. 2 në Tiranë.

“Besoj se mesazhi është i fortë dhe i qartë për mbështetjen tonë, jemi shumë më shumë se të gjithë të tjerët të marrë së bashku në atë njësi por kjo nuk do të thotë që nuk do t’u shërbejmë të tjerëve. Do të doja të kishim një tur zgjatje dore për të gjithë ata që mendojnë ndryshe nga ne,” u shpreh Veliaj teksa njoftoi fitoren e PS-së në njësinë nr.1

“Është një mandat shumë i fortë për të shërbyer, për të përveshur mëngët dhe për të bërë shumë punë të mira për Njësinë nr 1,” shtoi kryebashkiaku.

Veliaj paralajmëroi për një ditë të gjatë dhe të bukur nga selia rozë, ku do të ketë përditësime çdo 30 minuta në vazhdim.

Kryebashkiaku bëri gjithashtu thirrje për përmbyllje sa më të shpejtë të procesit të numërimit.

Ndërkohë, deputeti Arben Pëllumbi u shpreh për fitoren në njësinë nr.2 se ka një falënderim për qytetarët që i besuan PS-së.