Publikohet testamenti i Berlusconi, si u nda pasuria marramendëse e ish-presidentit 

Në testamentin e publikuar sot të ish-kryeministrit italian të ndjerë, Silvio Berlusconi, thuhet se pjesa më e madhe e kompanisë Fininvest do t’u takojë fëmijëve të tij Piero Silvio dhe Marina Berlusconi.

Së bashku do të zotërojnë 53 për qind të kompanisë, sipas ANSA.

Berlusconi i ka lënë 100 milionë euro vëllait të tij Paolo, po kaq të dashurës Marta Fassina, ndërsa 30 milionë euro i ka dhënë këshilltarit Marcello del Utri.

Përveç shpërndarjes së pasurive, agjencia italiane ka publikuar edhe një mesazh që biznesmeni italian ua ka lënë fëmijëve të tij.

“Faleminderit dhe shumë dashuri për të gjithë ju. Babai juaj”.

Vendimi për shpërndarjen e pronësisë së Fininvest u mor nga biznesmeni në vitin 2006, kur ai përpiloi testamentin e tij të parë.

Në atë kohë, ai deklaroi se Pier Silvio dhe Marina Berlusconi do të merrnin pronësinë e shumicës së kompanisë, por se trashëgimia e tij do të ndahej në mënyrë të barabartë. Pjesa tjetër e pronës do të shpërndahet mes fëmijëve të tjerë – Barbara, Eleonora dhe Luigi.

Asnjë nga fëmijët nuk do të ketë kontroll të drejtpërdrejtë mbi kompaninë siç kishte babai i tyre, thekson ANSA, duke shtuar se noteri do të kryejë të gjitha detyrimet ligjore në orët në vijim.

LEXONI GJITHASHTU:

• Hapet sot testamenti i Berlusconit, kush do ta përfitojë pasurinë 6.5 mld euro
• Italia miraton “Reformën Berlusconi”, shpërdorimi i detyrës s’është më krim