Qeveria zgjeron kompetencat e SHISH, fokus te kërcënimet kibernetike dhe siguria kombëtare

Qeveria miratoi këtë të mërkurë ndryshime ligjore që zgjerojnë kompetencat e Shërbimit Informativ të Shtetit (SHISH) në mbledhjen e informacionit për sigurinë kombëtare. Drafti parashikon që SHISH të fokusohet edhe te kërcënimet kibernetike, hibride, siguria ekonomike dhe mbrojtja e infrastrukturës kritike të vendit.

Sipas ndryshimeve, SHISH do të mbledhë informacion brenda dhe jashtë vendit për terrorizmin, ekstremizmin, aktivitetin e shërbimeve të huaja inteligjente, krimet kundër mjedisit dhe përhapjen e armëve të dëmtimit në masë.

Projektligji ndryshon edhe trajtimin financiar të drejtuesve të institucionit. Paga e drejtorit dhe zëvendësdrejtorit nuk do të jetë më e përcaktuar në ligj, por do të miratohet me vendim të Këshillit të Ministrave.

Po ashtu, SHISH-it i njihet e drejta për akses të kufizuar në bazat shtetërore të të dhënave, sipas funksioneve ligjore dhe përmes marrëveshjeve ndërinstitucionale.