QSHA: Gabimet në testin e Gjuhë-Letërsisë kanë qenë të qëllimshme

Qendra e Shërbimeve Arsimore (QSHA), ka zhvilluar një takim me mësues të gjimnazeve të Tiranës dhe qarqeve të tjera, për të diskutuar mbi pretendimet e ngritura nga maturantët, lidhur me testin e Maturës Shtetërore të Gjuhës shqipe dhe letërsisë.

Në këtë takim morën pjesë përfaqësues të Ministrisë së Arsimit, QSHA, DPAP, KOMSH, si edhe 20 mësues të Gjuhës shqipe dhe letërsisë nga shkolla të ndryshme të Tiranës, Fierit, Vlorës, Elbasanit etj.

Nga takimi u arrit në përfundimin se, testi i Gjuhës shqipe dhe letërsisë nuk ka dalë jashtë programit orientues dhe pyetjet nuk kanë gabime shkencore.

Lidhur me pretendimin se në test ka gabime drejtshkrimore, QSHA sqaron se ka vërtetë një tekst me gabime, por ky tekst është ndërtuar në mënyrë të qëllimshme i tillë, për të vlerësuar kompetencat gjuhësore të nxënësve. Kjo u është bërë e ditur maturantëve, përmes një fjalie sqaruese, që në fillim të tekstit.

Për përfshirjen në test të poezisë së Lasgush Poradecit, u qartësua se ky autor është i lexuar dhe i studiuar gjatë procesit mësimor në shkollë.

Përkundër gjithë këtij diskutimi të zhvilluar, QSHA vendosi se do të vlerësojë shpërndarjen e pikëve në bazë të rezultateve të nxënësve, si dhe do të konsiderojë heqjen nga vlerësimi përfundimtar i ndonjë pyetjeje specifike që rezulton të ketë pasur nivel më të lartë vështirësie se sa niveli i njohurive të nxënësve.

Lexoni gjithashtu:

Protesta e maturantëve, Vrapi: Reagimet për shkak të metodologjisë, s’ka më riprodhim