Raketat ruse godasin bllokun e banimit në Ukrainën Lindore, 15 viktima

Të paktën 15 persona kanë humbur jetën në qytetin Chasiv Yar në Ukrainën Lindore, pasi raketat ruse goditën një bllok banimi.

Numri i viktimave u konfirmua nga një zyrtar ukrainas i shërbimeve të urgjencës, teska mendohet që nën rrënoja të ketë persona të tjerë të pajetë, shkruan CNN.

Njëra pjesë e ndërtesës 5-katëshe u copëtua, ndërsa guvernatori i rajonit, Pavlo Kyrylenko tha se shkatërrimi erdhi si pasojë e sulmeve nga forcat ruse.

Një nga të mbijetuarat tha se vrapoi drejt e në bodrum, pas goditjes së parë, që më pas u pasua edhe nga dy të tjera.

Raketat ruse shkaktuan në 24 orët e fundit dëme të konsiderueshme në një seri qytetesh dhe fshatrash në lindje dhe jug të Ukrainës.

Pak ditë më parë, presidenti rus Vladimir Putin paralajmëroi Kievin se duhet të pranojë shpejt kushtet e Moskës ose të përgatitet për më të keqen.

Kremlini ka kërkuar më parë që Kievi të njohë sovranitetin rus mbi Gadishullin e Krimesë, të cilin e aneksoi në vitin 2014, si dhe të njohë pavarësinë e rajoneve separatiste të mbështetura nga Moska në Ukrainën lindore.

LEXONI GJITHASHTU

• Mbi 20 milionë tonë grurë i bllokuar, Ukraina kërkon rrugë të reja
• Shi raketash në Ukrainë; rusët nuk ndalen, sulmojnë qytete e fshatra