Rama prezanton paketë sociale për rritjen e çmimeve

Kryeministri Rama thotë se do të prezantojë një paketë të “rezistencës sociale”, për të përballuar çmimet që janë rritur ditët e fundit.

Rritja e çmimit të naftës dhe produkteve të shportës ka bërë që qytetarët të reagojnë me protesta për disa ditë me radhë, protesta masive që kanë mbledhur mijëra qytetarë në qytete të ndryshme të Shqipërisë.

Deri më tani qeveria Rama nuk ka prezantuar ndonjë paketë për mbështetje sociale për të përballuar këtë rritje të çmimeve, siç kanë bërë shtete fqinje si Greqia, apo Kosova.

Rama i quajti “pakicë” qytetarët që prej ditësh po protestojnë.

Paraditën e të shtunës, megjithatë, bulevardi kryesor i Tiranës u mbush me mijëra qytetarë që ngritën zërin, pasi me rritjen e çmimeve dhe me të ardhurat e ulëta nuk përballojnë dot jetesën minimale.

Paketën “rezistencës sociale”, Rama pritet ta prezantojë të shtunën në orën 15:00, në faqen e tij zyrtare në Facebook.