Rama fajëson qeverisjen e PD për pensionet: Skemat e pensioneve ngrihen me shekuj

Kryeministri Edi Rama mbajti këtë të hënë konferencën e fundvitit me gazetarët, ku u ndal dhe te skema e pensioneve. Shefi i qeverisë fajësoi qeverinë e Partisë Demokratike për pensionet e ulëta, duke thënë se skemat e pensioneve ndërtohen me shekuj në shtetet e zhvilluara.

Ai tha se personat që dalin në pension pas 2013-ës, përfitojnë pension më të madh se ata që kanë dalë në pension para reformës së bërë nga qeveria e tij.

Sipas tij, reforma që po konceptohet do të bëhet me qëllimin që të zbusë diferencën e krijuar.

Ai theksoi se për të mos rrezikuar skemën e pensioneve, qeveria ka vendosur të përdorë bonuset për të ndihmuar pensionistët.

“Reforma që ne po konceptojmë do të duhet të zbusë këtë padrejtësi historike. Jo që është bërë me pensionistët nga pikëpamja e padrejtësisë, e pabesisë, dhe nga pikëpamja e brutalitetit të dritëshkurtësisë është e ngjashme me atë që është bërë me Piramidat, por me efekt në kohë dhe në formën e stresit mbi të gjithë ata që janë viktimë e asaj. Të thuash që ju keni 11 vjet në qeveri dhe do thoni akoma ata, patjetër do themi ata, pasi sistemet e pensioneve ngrihen me shekuj dhe sistemet e pensioneve të ngritura së prapthi në çerek shekulli nuk mund të korigjohen dhe të kthehen së mbari për të gjithë është e pamundur. Prandaj bonuset janë një mundësi që pa prishur skemën dhe pa i hyrë në hak fëmijëve dhe pa i hapur të gjithë shqiptarëve një gropë si ajo e Sudes dhe Vehbiut, të mund t’i ëmbëlsojmë pensionistët.”

LEXONI GJITHASHTU:

• Rama: Shqipëria do të mikpresë samitin e NATO-s në vitin 2027
• Plani i Ri i Rritjes, Rama: Shqipëria do të përfitojë rreth 1 miliardë euro në 2027