Rama: Kënaqësi kur takoj Albinin, edhe pse shumë nuk e besojnë

Kryeministri, Edi Rama ka falenderuar kreun e qeverisë së Kosovës, Albin Kurtin për pritjen e delegacionit shqiptar në Prishtinë në kuadër të mbledhjes së përbashkët të dy qeverive.

Gjatë fjalës së tij në sesonin hapës të kësaj mbledhjeje, Rama u shpreh se është gjithmonë një kënaqësi kur takohet me Kurtin, edhe pse sipas tij, këtë gjë jo të gjithë e besojnë.

“Shprehjen e kënaqësisë për këtë moment, dua ta bëj duke falenderuar përzemërisht të gjitha ju, por veçanërisht Albinin. Duke e thënë publikisht edhe në sy të të gjithë atyre që na ndjekin, për mirë apo për keq se është një kënaqësi e veçantë edhe pse pak kush e beson kur e them se kur ne takohemi kemi një sinergji të plotë dhe qeshim jo pak. Kjo është shumë e rëndësishme”, deklaroi Rama.

Ndërsa, kryeministri i Kosovës, Albin Kurti nënvizoi se bashkëpunimi me Shqipërinë nuk ka qenë kaq intensiv dhe efektiv sa është sot.

Mbledhja e fundit mes dy qeverive ka qenë në muajin nëntor të vitit të kaluar, ku Shqipëria dhe Kosova nënshkruan 13 marrëveshje të reja në mbledhjen e përbashkët e dy qeverive në qytetin e Elbasanit.

LEXONI GJITHASHTU

• Kurti: Bashkëpunimi Kosovë-Shqipëri nuk ka qenë më efektiv se sa sot

• Ministrat shqiptarë udhëtojnë me autobus drejt Kosovës