Rama: Rritja e kontributit nga pagat, hap drejt përmirësimit të pensioneve

Kryeministri Edi Rama theksoi përpjekjet e qeverisë për të përmirësuar sistemin e pensioneve, duke e cilësuar atë si një “plagë” që po mbyllet.

Rama e lidhi këtë situatë me reformën e pensioneve të vitit 2014, e cila, sipas tij, ka sjellë përfitime të dukshme për ata që janë pensionuar pas asaj kohe, ndërkohë që ka krijuar diskriminim për ata që kanë dalë në pension më herët.

Kryeministri nënvizoi se, megjithëse reforma ka sjellë rritje të kontributit nga pagat dhe ka mundësuar dy bonuse për pensionistët, ajo mbetet një proces afatgjatë dhe jo një sprint, duke iu referuar situatës së vitit 2014, kur qeveria mori vendime të dhimbshme për të shmangur kolapsin financiar.

Ai bëri një paralelizëm mes situatës së dikurshme dhe arritjeve të sotme, siç është ulja e çmimit të energjisë që ka ndodhur që nga 1 shkurti, një vendim që është një rezultat i angazhimit të qeverisë për të mbajtur ulur ngarkesën për konsumatorët.

Rama theksoi se përmes një ekonomie të fuqishme, do të mundësohet një përfshirje më e madhe e pensionistëve në shpërndarjen e fryteve të zhvillimit ekonomik dhe do të rritet kapaciteti i fondit të sigurimeve shoqërore.

Ai gjithashtu theksoi se reforma e pensioneve e vitit 2014, e udhëhequr nga ekspertët e Bankës Botërore, është një histori suksesi, por me një mësim të rëndësishëm që;

“Politikat dritëshkurtëra mund të dëmtojnë shtresa të tëra të popullsisë, siç është rasti i pensionistëve të para vitit 2014, të cilët, përveç se kanë pasur të njëjtën periudhë punë dhe kanë kontribuar të njëjtat sigurime, marrin pensione më të ulëta se ata që janë pensionuar pas reformës”, tha Rama.

Pensionistët e rinj, siç përmendi Rama, shpesh fitojnë më shumë se 500 euro në muaj, ndërsa ata që janë pensionuar para vitit 2013, vazhdojnë të marrin pensione shumë më të ulëta.

“Sot mjekë, mësues, ekonomistë, njerëz nga sistemi i drejtësisë që kanë dalë në pension pas 2014 marrin pensione mbi 500 euro, ndërsa kolegët e tyre që kanë dalë në pension para 2013, marrin pensione shumë më të ulëta”, tha Rama.

LEXONI GJITHASHTU:

• “Bonusi nuk del për vitin e ri”, pensionistët në Gjirokastër: Do blejmë ç’të mundemi
• Rreth 30 mijë qytetarë do përfitojnë pension më të lartë, ja ligji i miratuar