Rama: Të ardhurat buxhetore në nivel historik

Kryeministri Edi Rama ka deklaruar se Shqipëria po regjistron një rritje historike të të ardhurave buxhetore. Ai e cilëson këtë si një tregues të rëndësishëm të zhvillimit ekonomik të vendit.

Në podkastin e tij “Flasim”, Rama u shpreh se, sipas projeksioneve, gjatë kësaj periudhe pritet të mblidhen mbi 1 miliardë euro të ardhura shtesë. Ai theksoi se kjo rritje nuk vjen si rezultat i rritjes së taksave, por si pasojë e zgjerimit të ekonomisë dhe përmirësimit të administrimit tatimor dhe doganor.

“Kjo javë është karakterizuar edhe nga një tjetër bilanc inkurajues: rritja e të ardhurave buxhetore në një nivel absolutisht historik. Një tregues i rëndësishëm i fazës ku ndodhet sot ekonomia shqiptare, një pasqyrë kuptimplotë e fuqizimit të saj. Në të kundërt të gjithë atyre që predikojnë rritjen e korrupsionit dhe rritjen e abuzimit, ekonomia provon se rritet pikërisht sepse ulet korrupsioni dhe ulen abuzimet, sepse këto të dyja bashkë nuk shkojnë përndryshe.

Të ardhurat që kanë arritur në nivele të reja janë pikërisht rezultat i një administrimi shumë më efikas, me shumë më pak korrupsion dhe abuzim, një karakteristikë e sëmundjes së rëndë të trashëguar nga e shkuara, të cilën e kemi luftuar dhe do të vazhdojmë ta luftojmë ditë për ditë”, tha ai.

Rama shtoi se përmirësimi i kontrollit mbi transaksionet, si dhe rritja e ndërgjegjësimit fiskal, kanë ndikuar ndjeshëm në këtë performancë.

“Sipas projeksioneve, në periudhën që kalojmë pritet të mblidhen mbi 1 miliard euro të ardhura shtesë, dhe jo nga rritja e taksave, sepse nuk kemi bërë rritje të taksave, por nga rritja e ekonomisë dhe, patjetër, edhe nga rritja e cilësisë së administrimit tatimor dhe doganor, rritja e cilësisë së kontrollit për sa i përket transaksioneve në nivelin e biznesit, mes biznesit dhe konsumatorit dhe biznesit me biznesin, si dhe rritja e ndërgjegjësimit fiskal”.