Rama: Të dhënat e shtetit nuk janë burim i listës së patronazhistëve, databaza jonë nuk bazohet në karta identiteti

Kryeministri i vendit, Edi Rama i ftuar në emisionin ‘Ilva Now’ përballë gazetares Ilva Tare sqaroi çështjen e shumëpërfolur ditët e fundit lidhur me të ashtuquajturit patronazhistë dhe akuzat e artikuluara nga opozita për nxjerrjen e të dhënave personale të votuesve.

Z. Rama u shpreh se në mënyrë vullnetare gjatë takimit në Elbasan kishte zbuluar numrit e tij të ID për të sjellë mesazhin se qytetarët nuk duhet të ndihen të shqetësuar për këtë gjë, pasi siç tha numri i ID në kartat tona të identitetit nuk është si në vende të zhvilluar që të çojnë në të dhëna sensitive për personin.

Sipas tij, informacioni i publikuar në media nuk është i PS pasi databaza e tyre nuk bazohet në karta identiteti.

“Çfarë ka dalë është një përzieje e informacioneve që ne kemi disponuar, por që nuk janë të reja, janë të vjetra dhe e informacioneve që janë hedhur aty, dhe ka një arsye se ata që kanë përhapur informacionet në media nuk i përgjigjen organeve ë hetimit për të dorëzuar bazën e të dhënave

Në Shqipëri ka ndodhur në 2009 që e gjithë baza e të dhënave e gjendjes civile ka dalë në internet dhe ka qenë e aksesueshme deri para ca ditësh dhe sot pashë që ka dalë një listë patronazhistësh e PD që ka edhe kartat e identitetit. Pra, kemi të bëjmë me një situatë që të dhënat që disponon shteti nuk janë burimi i kësaj gjurulldie. Nuk janë tonat, janë informacione të bëra çorap. Është një pasqyrë mbi të cilën janë futur duar dhe janë bërë shumë manipulime”, tha kryeministri.