Kryeministri Edi Rama ka njoftuar përmes një postimi në rrjetin social “Facebook” se fondi i veprimtarisë së shkrimtarit Ismail Kadare do të ruhet në një pavion të veçantë të Arkivit të Shtetit.
Rama bën me dije se familjarët e shkrimtarit të ndjerë kanë dorëzuar të gjithë koleksionin e e tij letrar, plus dorëshkrimet e pabotuara.
Sipas kryeministrit i gjithë koleksioni i dorëzuar do të restaurohet dhe digjitalizohet nga ana e Arkivit të Shtetit.
“Fondi i vyer i veprimtarisë letrare të shkrimtarit të madh Ismail Kadare do të ruhet në një pavion të veçantë të Drejtorisë së Përgjithshme të Arkivave.
Familjarët e shkrimtarit të madh kanë dorëzuar për ruajtje, administrim, restaurim dhe digjitalizim të gjithë koleksionin e tij letrar përfshirë dorëshkrime, skicë idesh, dorëshkrime të veprave të pabotuara si dhe drafte fillestare të punimeve të tij”, shkroi Rama në facebook.
Kujtojmë se Kadare ndërroi jetë më 1 Korrik 2024, në moshën 88-vjeçare, pas komplikacioneve shëndetësore.
LEXO GJITHASHTU:
- Rritet interesi për librat e Kadaresë, fluks lexuesish shqiptarë dhe të huaj
- Fjalimi i 2 vajzave të Kadaresë gjatë varrimit: Homazhi më i mirë, leximi i veprave
