Raporti: Starmer ishte paralajmëruar për ish-ambasadorin Mandelson që kishte lidhjen me Epstein

Kryeministri britanik Keir Starmer u përball me kritika të forta pas publikimit të dokumenteve që zbulojnë lidhjet e ish-ambasadorit të Britanisë në SHBA, Peter Mandelson, me financieri të dënuar për krime seksuale, Jeffrey Epstein.

Sipas një raporti të përgatitur nga ekipi i Starmer në dhjetor 2024, marrëdhënia e Mandelson me Epstein ishte konsideruar një “rrezik i përgjithshëm për reputacionin” para emërimit të tij si ambasador në SHBA. Dokumenti përmbledh informacionet e njohura publikisht mbi kontaktet e politikanit veteran të Partisë Laburiste me Epstein, të cilat, sipas raportit, vazhduan edhe pas dënimit të tij të parë në vitin 2008.

Raporti zbulon gjithashtu se Mandelson thuhet se kishte qëndruar në shtëpinë e Epstein në qershor 2009, ndërkohë që Epstein ishte në burg. Lidhjet mes tyre vijuan gjatë viteve 2009–2011, sipas dokumenteve të publikuara nga Departamenti i Drejtësisë i SHBA-së.

Emërimi i Mandelson shkaktoi debat të madh publik dhe presion mbi Starmer, i cili më pas e shkarkoi ish-ambasadorin në shtator 2025, pas një publikimi të dokumenteve shtesë që treguan thellësinë e marrëdhënies së Mandelson me Epstein. Një tjetër valë dokumentesh, e publikuar në janar, detajoi se qeveria kishte njohuri për lidhjet e Mandelson me Epstein në momentin e emërimit, duke rritur reagimin publik.

Dokumentet përfshijnë një raport të vitit 2019 nga JPMorgan, që citon të dhëna personale të Epstein, sipas të cilave marrëdhënia me Mandelson kishte nisur që në 2002 dhe kishte vazhduar gjatë gjithë viteve 2000. Këshilltari për sigurinë kombëtare i Starmer, Jonathan Poëell, e kishte konsideruar emërimin “të pazakontë” dhe procesin “çuditërisht të nxituar”.

Avokatët e Mandelson kishin kërkuar kompensimin e plotë të kontratës katërvjeçare si ambasador, e cila arrinte 547,201 paund, por ai mori vetëm 75,000 paund.

Së fundi, policia britanike arrestoi Mandelson nën dyshimin për shpërdorim detyre. Ai u lirua pas marrjes në pyetje, por mbetet nën hetim. Mandelson ka mohuar çdo shkelje penale dhe ka deklaruar se ndihet “thellësisht i tronditur” për miqësinë e tij me Epstein dhe për vuajtjet e viktimave të tij.