Raportimet nga Irani: Kemi goditur një anije amerikane

Sipas raportimeve të mediave shtetërore iraniane, Gardat Revolucionare të Iranit (Pasdaranët) kanë ndërmarrë një sulm ndaj një anijeje sulmuese amfibe të Shteteve të Bashkuara, e identifikuar si LHA-7.

Burimet iraniane pretendojnë se si pasojë e këtij sulmi, anija amerikane është detyruar të tërhiqet drejt pjesës jugore të Oqeanit Indian. Megjithatë, nuk ka ende konfirmim të pavarur nga burime ndërkombëtare apo amerikane lidhur me këtë pretendim.

Në të njëjtën kohë, sipas të njëjtave media, Pasdaranët kanë goditur edhe një anije transporti mallrash, për të cilën thuhet se ishte në pronësi të Izraelit. Anija raportohet të jetë identifikuar me kodin “SDN7”, por vendndodhja e saj nuk është bërë e ditur.

Zhvillimet vijnë në një kontekst tensioni të shtuar në rajon, ndërsa mbetet e paqartë shkalla reale e dëmeve apo pasojave të këtyre sulmeve të raportuara.