Reciprociteti me Serbinë, Kurti mbledh sot Këshillin e Sigurisë

Kryeministri i Kosovës, Albin Kurti do të mbledhë këtë të dielë Këshillin e Sigurisë.

Kurti e konfirmoi mbledhjen gjatë konferencës së të shtunës, teksa do të diskutohen nëse janë marrë të gjitha masat për zbatimin e vendimeve të qeverisë, për reciprocitetin me Serbinë, në lidhje me targat dhe dokumentet.

“Duke pasur parasysh se javët në vijim është e domosdoshme që gjithçka të shkojë mirë me procesin e shndërrimit të targave të automjeteve dhe në çdo vendkalim kufitar gjithçka të shkojë mirë sa i përket efikasitetit të dokumenteve të cilat do të lëshohen për qytetarët që vijnë nga Serbia në Kosovë e kemi një mbledhje të Këshillit të Sigurisë ku do t’i diskutojmë me krerët e organeve dhe agjencive të ndryshme shtetërore dhe me disa prej ministrave çështjet të cilat do të mund të shfaqin e që duhet t’i kemi parasysh”, deklaroi Kurti.

Nga data 1 gusht deri më 30 shtator 2022, në Kosovë do të fillojë organizimi i procesit për regjistrimin e targave ilegale në ato “RKS”, në të gjitha Qendrat për Regjistrimin e Automjeteve.

Gjithashtu, nga e hëna, shtetasit e Serbisë që do të hyjnë në Kosovë, do të pajisen me një ‘dokument hyrje/dalje’.

Kosova brenda territorit të saj i bën të pavlefshme dokumentet e lëshuara nga autoritetet serbe, si masë reciprocitetit ndaj shtetit që nuk i njeh dokumentet identifikuese të lëshuara nga Kosova.

LEXONI GJITHASHTU

• Të hënën nis reciprociteti, qytetarët informohen për pajisjen me targa “RKS”
• Nga 1 gushti serbët s’futen dot në Kosovë me dokumentet e tyre
• Reciprociteti për targat, Vuçiç: Jam i shqetësuar