Regjistrimet në universitete, degët më të preferuara dhe që rrezikojnë të mbyllen

Raundi i dytë i regjistrimeve në universitetet në vend ka përfunduar.

Në universitetin “Luigj Gurakuqi” në Shkodër, deri më tani janë regjistruar rreth 850 studentë. Edhe këtë vit, më të preferuara mbeten degët Infermieri dhe Fizioterapi. Pak interes është shfaqur për degën Mësuesi, ndërsa dega Fizikë rrezikon mbylljen.

Situata në universitetin e Elbasanit nuk është ajo më e mira e viteve të fundit. Aktualisht janë ezauruar 44.2% e kuotave që kanë qenë në dispozicion. Nga 2,573 kuota të lira, janë regjistruar 1,138 studentë. Edhe për këtë raund, degët më të preferuara janë ato të Mjekësisë.

Në degën e Mësuesisë janë ezauruar vetëm 13% e kuotave. Degët Histori-Gjeografi dhe Gazetari kanë përkatësisht 3 dhe 1 studentë të regjistruar, duke rrezikuar mbylljen e tyre.

Në universitetin “Aleksandër Moisiu” në Durrës, ka 400 regjistrime në raundin e dytë. Sipas shifrave, janë plotësuar 80% të kuotave në Fakultetin e Edukimit dhe 100% lëndët e Shkencave Teknike Mjekësore, si dhe lëndët e Shkencave Kompjuterike.

Rënie ka pasur në regjistrimet e programeve të Shkencave Politike apo Drejtësisë. Një rënie të lehtë ka edhe në programet e Mësuesisë.

Në universtetin “Fan S. Noli” në Korçë, degët më të preferuara janë Teknologji-Informacioni, Financë-Kontabilitet, Menaxhim Biznesi, Infermieri. Mbyllje të pjesshme mund të kenë degët Matematikë, Gjuhë Franceze dhe Biznes.

Një rënie ka edhe numri i regjistrimeve në degën e Bujqësisë.

LEXONI GJITHASHTU

• Regjistrimet në universitete, degët më të preferuara dhe që rrezikojnë të mbyllen
• Ish-zv.ministrja e Arsimit: Si vidhen fondet në universitete
• Nesër protestë, pedagogët: Kërkojmë kthimin e dinjitetit të punonjësve universitarë