Reja para miqësores, komenton listën dhe kontratën: Do të flasim kur të mbarojë

Trajneri Edoardo Reja ka zhvilluar dhe konferencën e parë për shtyp në prag të testit miqësor me Katarin. Italiani iu është përgjigjur pyetjeve të gazetarëve, ndërkohë nuk ka lënë pa komentuar dhe kontratën e tij që skadon në muajin nëntor.

“Nuk ka ndryshuar asgjë në lidhje me herën e fundit që kemi folur për këtë çështje. Nuk ka asgjë të re dhe nuk mund të shtoj asgjë, përveçse kur të mbarojë kontrata do të ulemi me të gjithë dhe të diskutojmë për të ardhmen”, tha Reja.

Më tej 77-vjeçari foli dhe për listën e lojtarëve të grumbulluar dhe kritikave ndaj tij.

“Sigurisht që ky është një diskutim i përhershëm, pjesa e listës. Ka lojtarë që mund të ishin, ka lojtarë që do të donin të ishin, por sigurisht që ne nuk mund t’i marrim dot të gjithë. Nëse i vini re, mosha më e madhe e lojtarëve në këtë listë është diku 25 vjeç, pra kemi marrë lojtarë që janë të rinj dhe që ndoshta mund të premtojnë për perspektivën. 22-23-24 vjeç. Sigurisht që ka edhe lojtarë të tjerë të vlefshëm në kampionatin shqiptar, por unë kam zgjedhur ata që unë mendoj se mund të jenë më të përshtatshëm dhe që mund të na shërbejnë më shumë për një miqësore të tillë”, u shpreh trajneri i Kombëtares.

Shqipëria dhe Katari përballen me njëra-tjetrën në Marbeja të Spanjës më 9 nëntor, në përballjen e tretë mes tyre.

LEXONI GJITHASHTU:

• Reja grumbullon 22 lojtarë nga Superiorja për miqësoren me Katarin
• Altin Rraklli: Kombëtarja ka nevojë për një trajner shqiptar që jeton në Shqipëri