Republikanët bllokojnë ndihmën miliarda dollarë për Ukrainën dhe Izraelin

Anëtarët e Senatit në SHBA nga radhët e Partisë Republikane, kanë bllokuar miratimin e ndihmave për Ukrainën pas dështimit për të siguruar kompromise rreth menaxhimit të kufirit, të cilat i kishin kërkuar si shkëmbim.

Pakoja 110-miliardëshe përfshinte 61 miliardë dollarë ndihma për Ukrainën si dhe fonde për Izraelin e për ndihma në Gaza.

Kundër projektligjit votuan 51 senatorë, ndërsa vetëm 49 e përkahën atë. Për miratimin e pakos nevojiteshin 60 vota. Ky votim sjell paqartësi për të ardhmen e ndihmave të Shteteve të Bashkuara për Ukrainën dhe i kthen ligjvënësit në tavolinën e bisedimeve vetëm disa ditë para pushimit të planifikuar dimëror të Kongresit.

Të gjithë anëtarët e Partisë Republikane në senat votuan kundër ndihmave, bashkë me senatorin e pavarur, Bernie Sanders, i cili më herët gjatë ditës kishte shprehur rezerva për shkak të përfshirjes së miliarda dollarëve ndihmë ushtarake për Izraelin.