Rikthehet kaosi në aksin Elbasan–Librazhd, qindra automjete të bllokuara

Qarkullimi në disa segmente të rrugës kombëtare Elbasan–Librazhd, deri në zonën e Kthesave të Dragostunjës, është paralizuar sërish, ndërsa qindra automjete kanë mbetur të bllokuara për shkak të fluksit të lartë dhe ngricave në rrugë.

Sipas pamjeve nga terreni, mijëra pasagjerë që udhëtojnë nga Përrenjasi dhe Librazhdi drejt Elbasanit po përballen me pritje të gjata, ndërsa lëvizja e mjeteve është e kufizuar ose e pamundur në disa segmente.

Situata paraqitet më problematike në zonat e njohura për ngrica të shpeshta, si Kthesat e Murrashit, Dragostunjës dhe Pishkashit, ku mungesa e ndërhyrjes në kohë ka sjellë bllokim pothuajse të plotë të qarkullimit.

Një situatë e ngjashme u regjistrua edhe një ditë më parë, kur radhët e automjeteve u shtrinë për dhjetëra kilometra, nga Fushë-Labinoti i Elbasanit deri te Ura e Bushtricës në bashkinë e Përrenjasit.

Policia u bën thirrje drejtuesve të mjeteve të tregojnë kujdes të shtuar dhe të përdorin goma dimërore në segmentet ku janë të pranishme ngricat.