Rikthimi i Ermonela Jaho, sopranoja shqiptare shkëlqen në Operën Kombëtare Greke

Pas 7 muaj mungesë për shkak të COVID-19, Opera Kombëtare Greke ka rihapur dyert, duke prezantuar një video sa inteligjente aq dhe humoristike, të titulluar “Opera greke është e sigurt”, me qëllim informimin e publikut për masat mbrojtëse të marra në perfeksion.

Në video, baritoni Haris Andrianos performon një përshtatje të veprës Don Zhuani të Mozartit. Versioni i ri, në vend të bëmave të Don Zhuanit flet për listën e masave mbrojtëse të marra nga Opera Kombëtare Greke kundër coronavirusit.

“E nisëm veprimtarinë tonë me shumë ngurrim. Por vetëm pak ditë më vonë publiku reagoi me ngrohtësi, sepse kushdo e ndjen që ne kemi marrë të gjitha masat e duhura për mbrojtjen e shëndetit publik. Unë jam i fiksuar për sigurinë e teatrove”, u shpreh Giorgos Koumendakis, drejtor artistik, Opera Kombëtare Greke.

Shfaqja e parë për sezonin e ri është “Madama Butterfly” nga Giacomo Puccini. Ishte një punë historike për Operën Kombëtare Greke, pasi është opera e parë e vënë në skenë ndonjëherë nga ajo si një organizatë e sapo-themeluar, më 25 tetor 1940, tre ditë para shpalljes së luftës italo-greke.

Ermonela Jaho ka lindur në Shqipëri dhe jeton në Nju Jork. Ajo është cilësuar nga “The Economist” si sopranoja më e vlerësuar në botë. Ajo është rikthyer në skenë pas 8 muaj ndërprerje, për shkak të COVID-19.

 “Përpara dhe pas çdo shfaqjeje jam e përlotur, sepse ndihem me fat që jam atje. E puth skenën sa herë që marr duartrokitje. Ndoshta sepse mund të jetë hera e fundit. Ndoshta sepse shfaqja tjetër do të jetë pas disa muajsh. Emocionalisht është diçka e pabesueshme.

Më tepër se e çuditshme është paksa e vështirë të mos e shohësh të gjithë publikun, të ndjesh energjinë që përcjell ai. Por sërish, edhe nëse është një person i vetëm që të sheh, që krijon një lidhje me ty, është një arritje”, tha sopranoja Ermonela Jaho.

“Madama Butterfly” do të shfaqet deri më 15 nëntor.