Rikuperohet Van Goghu i vjedhur që vlen 6 mln euro, detektivi ia kthen muzeut

Është e vështirë të imagjinohet, por përmbajtja e kësaj çante vlen nga 3 deri në 6 milionë euro.

Është një pikturë e Van Gogh, që ishte vjedhur nga një muze i Holandës tre vjet më parë. Personi në video është detektivi Arthur Brand, i njohur ndryshe si “Indiana Xhons i botës së artit”.

Pas një hetimi të gjatë dhe në bashkëpunim me policinë holandeze, ai arriti të rikuperonte pikturën pasi u kontaktua nga një person që kishte akses tek ajo.

“U deshën 1 mijë e 300 ditë, por ja ku është dhe unë do t’ia dorëzoj pas pak drejtorit të muzeut. Besoj se ai do të jetë i lumtur”, tha Arthur Brand, detektiv privat.

Piktura daton që nga viti 1884 dhe u vodh nga muzeu “Singer” në qytetin e Larenit në mars të 2020-s, në mes të pandemisë, kur muzeu ishte i mbyllur. Si autori i vjedhjes edhe marrësi i pikturës tani janë prapa hekurave.

Bëhet fjalë për një tjetër aventurë të detektivit Arthur Brand, që përfundon mirë.

LEXONI GJITHASHTU:

• Piktura e artistit të njohur austriak shitet për çmimin rekord
• Falsifikoi pikturat e artistit të njohur, 5 vite burg për ish-drejtorin e ankandit