Rita Petro: Gjysha ime ishte gruaja e heroit të parë komunist, por festonte Krishtlindjet

Shkrimtarja Rita Petro tregoi në emisionin Now në Euronews Albania se si festoheshin Krishtlindjet në familjen e saj edhe në kohën e komunizmit kur feja ishte e ndaluar.

Ajo rrëfeu se si gjyshja e saj në Korçë ndiqte ritet e festës në fshehtësi, edhe pse ishte gruaja e heroit të parë komunist në këtë qytet.

“Në Korçë kam pasur njerëzit e mamit, ku bënin ëmbëlsira, i shpërndanin në lagje, çdo gjë bëhej fshehurazi edhe pse gjyshja ishte gruaja e heroit të parë komunist në Korçë, Koçi Bakos. Mbaj mend shumë, sidomos te halla, e cila hapte një sirtar kur vinte nata, ishte gjysmë errësirë dhe mbante ikona, në shtëpinë time nuk i kisha parë. Pusho, më thoshte, se për këto të fusin në burg, i vinte përpara në komedinë dhe i binte ajo gjysmë errësira me ato flokët e bardha dhe lutej, mësonte dhe mua. Mbaj mend që na vinin kartolinat nga Amerika ku shkruhej edhe Gëzuar Vitin e Ri dhe Gëzuar Krishtlindjen dhe mbaj mend që pyesja mamin se ne nuk e festonim”, tregoi shkrimtarja.