“Rivalët e Berishës”, gazetari: Këta tre emra synojnë postin e kryetarit të PD-së

Gazetari i Euronews Albania, Ardit Hoxha, ka folur pasditen e kësaj të premteje në edicionin informativ me moderatoren Mirela Milori, lidhur me procesin zgjedhor brenda Partisë Demokratike. Ai ka bërë të ditur tre emrat që qarkullojnë si kandidatë të mundshëm përballë Berishës, por që ende nuk janë njohur zyrtarisht nga lidershipi i PD-së.

“Nuk dimë nëse do të ketë garë apo se kur do të zhvillohet procesi, që për disa është një lloj referendumi, apo e thënë ndryshe, një lloj votëbesimi për Sali Berishën, përderisa nuk ka një rival që nuk është shfaqur ende publikisht. E them këtë publikisht, se nuk kemi një rival ende të pranuar nga lidershipi i Partisë Demokratike. Sepse të tre emrat që kanë shpallur ambicien, qoftë në deklarata të ndryshme, njëri nuk cilësohet si anëtar në rastin e zonjës Kokalari, apo zonja Balliu që konsiderohet nga lidershipi i PD si jo serioze, apo për Salianjin që përdoret termi ‘vetëpërjashtuar’. Pra, për të tre është gjetur një togfjalësh, një element për mos t’i lejuar të bëhen pjesë e kësaj gare,” – tha Hoxha.