Rrëzohet avioni i marinës së Koresë së Jugut, humbin jetën 4 anëtarë të ekuipazhit

Katër anëtarë të ekuipazhit humbën jetën pas rrëzimit të një avioni të marinës së Koresë së Jugut të llojit P-3C Orion në qytetin bregdetar juglindor të Pohang.

Ngjarja tragjike ndodhi të mërkurën pasdite, rreth orës 13:43 me orën lokale, kur avioni turbohelikë, i përdorur për patrullime detare, u ngrit nga baza ajrore në qytet dhe u rrëzua për arsye ende të panjohura.

Sipas një deklarate nga Marina e Koresë së Jugut, trupat e katër viktimave janë identifikuar dhe po vazhdon procesi i rikuperimit të tyre. Në përgjigje të incidentit, marina ka krijuar një grup pune për të hetuar shkakun e rrëzimit, ndërsa ka pezulluar përkohësisht operimet me flotën e saj të avionëve P-3C.

Zyra emergjente në Pohang konfirmoi se menjëherë pas rrëzimit, ekipe shpëtimi dhe zjarrfikës u dërguan në vendngjarje pas raportimeve të banorëve për një avion të rrëzuar në një kodër pranë një kompleksi banimi, duke shkaktuar zjarr. Në operacion morën pjesë dy helikopterë dhe rreth 40 zjarrfikës.

Ndërkohë, Marina e Koresë së Jugut është në proces të modernizimit të flotës së saj ajrore me avionë të avancuar Boeing P-8A Poseidon, me ndërtimin e tyre që pritet të përfundojë deri në mesin e vitit 2025. Hetimet për zbardhjen e plotë të shkaqeve të këtij aksidenti vijojnë.

LEXONI GJITHASHTU:

• Gjykata rrëzon tarifat, “tërbohet” Shtëpia e Bardhë: Nuk mund të vendosin gjyqtarët
• Erdogan vlerëson propozimin rus: Potencial real për paqe të qëndrueshme