Rriten aksionet e Teslas pas mbështetjes së Trump, ekspertët: Bojkoti do vijojë

Aksionet e Tesla-s u rritën mëngjesin e së mërkurës pas një shfaqjeje të presidentit Donald Trump dhe Elon Musk, të cilët e kthyen Shtëpinë e Badhë në një showroom, ku promovuan dy prej modeleve të makinave elektrike Tesla.

Kjo lëvizje erdhi pas një periudhe të vështirë për Tesla-n, ku shitjet pësuan një rënie të ndjeshme që nga fillimi i vitit.

Aksionet e Tesla-s u rritën me 3.2%, duke arritur vlerën e 237.90 dollarëve për aksion. Kjo rritje pasoi një tjetër prej 3.8% të martën, pas një postimi të Trump në Truth Social ku ai njoftoi se do të blinte një Tesla në mbështetje për prodhuesin e makinave elektrike.

Tesla ka përballuar sfida të shumta, përfshirë rënien e shitjeve në disa rajone kyçe, për shkak të qëndrimeve politike të Elon Musk. Për të kuptuar më mirë ndikimin e këtyre zhvillimeve, investitorët do të presin raportin e Tesla-s për tremujorin e parë, që pritet të publikohet më 2 prill.

Tesla është përballur me një valë sulmesh ndaj tregtarëve dhe objekteve të saj, të nxitura nga pakënaqësia me aktivitetet politike të Muskut, përfshirë udhëheqjen e tij të Departamentit të Efikasitetit të Qeverisë (DOGE), që kërkon të shkurtojë fuqinë punëtore dhe programet federale.

Vandalizmi ka shkaktuar humbje të konsiderueshme financiare, duke nxitur qëndrimin e fortë të Trumpit dhe shfaqjen publike të mbështetjes për kompaninë.

Pavarësisht rritjes së aksioneve, analistët janë të kujdesshëm për të ardhmen e Tesla-s. Garrett Nelson nga CFRA uli vlerësimin e tij të fitimeve për aksion për vitin 2025 në 2.50 dollarë, duke theksuar se aksionet e Tesla-s kanë përjetuar një rënie prej 40% që nga viti 2018. Megjithatë, Nelson mbetet optimist dhe e konsideron Tesla-n si një mundësi blerjeje për investitorët që kërkojnë mundësi fitimprurëse afatgjata.

Mbështetja nga Trump mund të ketë ndikim në perceptimin e konsumatorëve dhe investitorëve, por analistë besojnë se bojkoti i blerjes së automjeteve mund të vijojë.