Rriten kursimet në banka, qytetarët shtojnë depozitat në lekë dhe në euro

Kursimet që ruajne qytetaret ne banka janë rritur ndjeshëm ne muajin tetor. Sipas monedhes, ata kane depozituar 10 mld leke dhe 36 milione euro.

Rriten kursimet në banka. Të dhënat e Bankës së Shqipërisë tregojnë se depozitat kanë pësuar shtim si në lekë edhe në monedhën europiane. Depozitat në monedhën kombëtare u shtuan me 10 miliardë lekë gjatë muajit tetor, duke arritur në 898 miliardë.

Ndikimi kryesor ka ardhur nga individët, edhe pse norma e interesit u ul në 2.5%, nga 3.25% që ishte deri në maj 2024. Ulja e normave të interesit nënkupton më pak fitime për qytetarët që kanë para në depozita bankare.

Depozitat janë shtuar edhe në monedhën europiane. Nga të dhënat e Bankës së Shqipërisë vërehet se në tetor depozitat në euro kanë shkuar në 8.66 miliarde, duke pësuar një rritje me gati 36 milionë euro.

Në këtë segment shtimi i depozitave është ndikuar kryesisht nga bizneset por edhe nga individët. Rritja e depozitave në monedhën europiane është një faktor që tregon se në ekonominë shqiptare qarkullon sasi e lartë e kësaj monedhe.

Në total sipas Bankës së  Shqipërisë totali i kursimeve në fund të tetorit, ishte 1.46 trilionë lekë, me një rritje me bazë vjetore prej 122 miliardë lekësh, ose 9% më shumë.