Rritet besimi në ekonomi | BSH: Konsumatorët dhe biznesi i shërbimeve janë optimistë

Ndjesitë për një situatë ekonomike më të mirë, janë pozitive këtë periudhë. Me përgjigjet që japin konsumatorët dhe bizneset, besimi është rritur në muajin janar, sikundër edhe pritjet për të ardhmen.

Perceptimi për një situatë pozitive ekonomikë është rritur këtë fillimvit. Sondazhi mujor i Bankës së Shqipërisë tregon se qytetarët dhe biznesi i shërbimeve kanë dhënë përgjigje optimiste për portofolin, blerjet, punësimin dhe cmimet, duke cuar nivelin e besimit në 106 pikë nga 104 që ishte në muajin dhjetor.

Por, ka edhe shenja pesimizimi në industri, ndërtim dhe tregti. Të pyeturit që menaxhojnë këta sektorë ankohen për ulje të numrit të kontratave porositëse nga eksportet. Ndërkohë, tregtarët nuk duket të jenë fort optimistë për ecurinë e biznesit të tyre.

Megjithatë, në pikëzimin total prirjet për stabilizimin e cmimeve dhe menaxhimin e të ardhurave e shpenzimeve shfaqin pritje pozitive në ekonomi.

Treguesi i ndjesisë ekonomikë matet nga Banka e Shqipërisë që nga viti  2016, dhe përgjatë 7 viteve, nivelet më të ulëta të besimit janë parë pas mbylljes nga pandemia, ndërsa nivelet më të larta në qershor 2017 dhe korrik 2021.