Rritja e çmimeve, ministri Malaj: Masat e para synojnë mbrojtjen e shtresave në nevojë

Ministri i Financave, Petrit Malaj, zhvilloi këtë të enjte një konferencë për mediat ku u ndal në një sërë çështjesh siç është edhe ajo e rritjes së çmimeve, që lidhet me konfliktin në Lindjen e Mesme.

Sipas ministrit, ekonomia e vendit po monitorohet në mënyrë të vazhdueshme nga Ministria e Financave dhe Banka e Shqipërisë, ndërsa theksoi se çdo masë e mundshme do të orientohet fillimisht drejt mbrojtjes së shtresave më vulnerabël, si pensionistët dhe familjet në ndihmë ekonomike.

“Situata aktuale është në monitorim të vazhdueshëm si nga Ministria e Financave dhe nga Banka e Shqipërisë. Rishikimi i rritjes ekonomike është një veprim i drejtë dhe këto rishikime do të ndodhin përderisa situata është dinamike dhe nuk e dimë se si do të përfundojë konflikti në Lindjen e Mesme.

Nga ana e qeverisë jemi duke monitoruar në mënyrë të vazhdueshme situatën, kryesisht edhe si do të reagojë tregu për sa i përket rritjes së çmimeve.

Me rekomandimin e Bankës Botërore dhe Fondit Monetar, reagimet e qeverisë duhet të orientohen fillimisht drejt mbrojtjes së grupeve vulnerabël, shtresave në nevojë, pra pensionistëve dhe familjeve që marrin ndihmë ekonomike.

Çfarëdo lloj mase që të marrim për të ndërhyrë në treg për të përmirësuar situatën do të raportohet me partnerët tanë”, u shpreh Malaj.