“Ruanda”| Dy deputetë britanikë japin dorëheqjen si zv.kryetarë të Konservatorëve

Dy nënkryetarë të Partisë Konservatore Lee Anderson dhe Brendan Clarke-Smith kanë dhënë dorëheqjen nga rolet e tyre pasi të dy mbështetën amendamentet e ‘rebelëve’ ndaj projektligjit të kryeministrit britanik Rishi Sunak për Ruandën.

Sipas mediave të huaja, Lee Anderson dhe Brendan Clarke-Smith thanë të dy se do të mbështesin ndryshimet e propozuara të krijuara për të ashpërsuar projektligjin e zotit Sunak, i cili kërkon të shpallë Ruandën një vend të sigurt për të deportuar azilkërkuesit.

Amendamenti, i promovuar nga “rebelët” konservatorë të krahut të djathtë u refuzua me shumicë dërrmuese në Dhomën e Komunave, me 529 vota kundër 68.

Në letrën e tyre të përbashkët, Anderson dhe Clarke-Smith thonë se duan që projektligji të funksionojë, por nuk besojnë se do të funksionojë.

“Edhe pse është dëshira jonë për të forcuar legjislacionin, kjo do të thotë se për të votuar pro amendamenteve do të duhet t’ju ​​paraqesim dorëheqjen”, thanë ata.

Partia e kryeministrit Rishi Sunak është thellësisht e ndarë për formulimin e projektligjit, i cili synon të parandalojë azilkërkuesit që të shkojnë në gjykatë për të bllokuar dëbimin e tyre.