Rumania dhe Bullgaria në Schengen, nga e diela qytetarët lëvizin të lirë

Rumania dhe Bullgaria do t’i bashkohen të dielën zonës Schengen. Lëvizja fillimisht do të zbatohet për udhëtarët që mbërrijnë në rrugë ajrore dhe detare.

Ndërsa sa i takon asaj tokësore, shteti anëtar Austria do të vijojë negociatat për nevojën e kontrolleve më të forta për qytetarët që vijnë nga 2 vendet.

Më herët Austria kishte bllokuar hyrjen e Bullgarisë dhe Rumanisë në zonën Schengen e shqetësuar nga emigracioni ilegal, por arriti një marrëveshje në parim me dy vendet anëtare të Bashkimit Evropian.

“Schengeni ajror nuk të ndihmon, nuk është asgjë. Më parë duhej realizuar ai tokësor. Autoritetet duhet ta zgjidhin këtë. Ajri dhe deti nuk mjaftojnë”, thotë një qytetar.

“Mendoj se është diçka pozitive që të mos humbasim kohë në radhët e aeroporteve”, shprehet një tjetër.

Zona Schengen u ngrit në vitin 1985. Përpara aderimit të pjesshëm të Bullgarisë dhe Rumanisë, ajo përbëhej nga 23 nga 27 vendet anëtare, bashkë me Zvicrën, Norvegjinë, Islandën dhe Lihtenshtejnin.