Rusia bëhet shteti i parë që njeh qeverinë talebane të Afganistanit

Rusia është bërë vendi i parë që ka njohur zyrtarisht sundimin e talebanëve në Afganistan, duke i dhënë një mbështetje të fortë qeverisë së Emiratit Islamik të Afganistanit.

Ministri i Jashtëm i Afganistanit, Amir Khan Muttaqi, e quajti këtë një vendim “të guximshëm”, ndërsa shprehu besimin se kjo do të hapte një “fazë të re të marrëdhënieve pozitive dhe të ndërsjellta” mes dy vendeve.

Vendimi i Rusisë u bë i njohur gjatë një takimi të zhvilluar në Kabul, ku Ambasadori i Rusisë në Afganistan, Dmitry Zhirnov, i dorëzoi Ministrit Muttaqi një notë diplomatike që konfirmonte njohjen e qeverisë talebane. Në këtë takim, Muttaqi theksoi se ky akt do të shërbente si një shembull për vendet e tjera, duke inkurajuar njohjen dhe angazhimin ndërkombëtar me talebanët.

Nga ana tjetër, Ministria e Jashtme ruse tha se ky hap i mundëson zhvillimin e bashkëpunimit ekonomik dhe tregtar midis dy shteteve, veçanërisht në fushat e energjisë, transportit, bujqësisë dhe infrastrukturës. Po ashtu, Rusia shprehu gatishmërinë për të vazhduar mbështetjen e Kabulit në luftën kundër kërcënimeve të terrorizmit dhe trafikimit të drogës.

Rusia ishte një nga vendet e pakta që nuk e mbylli ambasadën e saj në Kabul gjatë rikthimit të talebanëve në pushtet në vitin 2021 dhe ka vazhduar të mbajë një linjë më të hapur për bashkëpunimin me ta. Ajo ishte gjithashtu vendi i parë që nënshkroi një marrëveshje ekonomike ndërkombëtare me talebanët në vitin 2022, duke siguruar furnizimin e Afganistanit me naftë, gaz dhe grurë.

Në prill të këtij viti, talebanët u hoqën nga lista e organizatave terroriste të Rusisë, një hap tjetër që ka hapur rrugën për krijimin e një “partneriteti të plotë” mes dy shteteve.

LEXONI GJITHASHTU:

• Zjarret pyjore në Turqi morën dy jetë, pretendohet për zjarrvënie të qëllimshme
• Dorëheqje masive në bashkinë e Vlorës pas ultimatumit të kryeministrit Rama