Rusia kritikon ‘elitat neoliberale’ për heshtjen ndaj arrestimit të Durov

Rusia ka kritikuar “elitat neoliberale” për heshtjen e tyre lidhur me arrestimin e themeluesit të Telegram Pavel Durov nga autoritetet franceze.

Kështu, përmes këtij reagimi, i ka kërkuar komunitetit global të flasë kundër ndalimit të tij, i cili është i barabartë me shtypjen e fjalës së lirë dhe shkeljen e ligjit ndërkombëtar.

Zëdhënësja e Ministrisë së Jashtme ruse, Maria Zakharova gjatë një konference për shtyp në Moskë ka thënë se Parisi ka shkelur edhe një herë normat ndërkombëtare që rregullojnë mbrojtjen e lirisë së shprehjes.

“Dhjetëra miliona përdorues të mediave sociale janë të indinjuar, përfaqësuesit e komunitetit financiar dhe figura të shumta publike të pavarura janë në gjendje shoku, megjithatë elitat neoliberale mbeten të heshtura,” -tha Zakharova.

Mediat franceze raportuan se arrestimi i Durov ishte i lidhur me mungesën e moderimit në platformën e mesazheve dhe refuzimin e tij për të bashkëpunuar me agjencitë e zbatimit të ligjit.

Parisi e akuzon Durovin se është bashkëpunëtor i krimeve të kryera përmes Telegramit, duke përfshirë trafikun e drogës, krimet kundër fëmijëve dhe mashtrimin.

LEXONI GJITHASHTU:

• WSJ: Macron i kërkoi Durovit të zhvendoste selinë e Telegram në Paris 
• Medvedev i bën thirrje Francës të ndalojë Zuckerberg pas arrestimit të Durov